Минский городской исполнительный комитет
Першамайскі раён – светлай мары крыніца
Версия для слабовидящихІнстытут гісторыі НАН Беларусі і Цэнтральная навуковая бібліятэка імя Якуба Коласа НАН Беларусі запрашаюць 3 мая 2018 г. у 15.00 на прэзентацыю навуковай манаграфіі «Грамадска-палітычнае жыццё ў Беларусі 1772–1917 гг.», якая выйшла ў выдавецтве «Беларуская навука».
Кніга з’яўляецца вынікам працы аўтарскага калектыва, у склад якога ўвайшлі даследчыкі Інстытута гісторыі НАН Беларусі, Беларускага дзяржаўнага педагагічнага ўніверсітэта імя Максіма Танка, Рэспубліканскага інстытута вышэйшай школы, Акадэміі кіравання пры Прэзідэнце Рэспублікі Беларусь.
Гэта выданне адметна тым, што гістарычныя працэсы паказаны як на макра-, так і на мікраўзроўнях. Дзякуючы шырокаму колу крыніц, новым ракурсам і падыходам, гэта кніга падае не толькі аб’ёмную гістарычную панараму, але ўводзіць чытача ў супярэчлівы, напружаны, таямнічы свет ХІХ стагоддзя.
Да мерапрыемства прымеркавана выстава кніг з фондаў Цэнтральнай навуковай бібліятэкі імя Якуба Коласа НАН Беларусі. На ёй прадстаўлена ранняя гістарыяграфія XIX і пачатку ХХ стагоддзяў, у прыватнасці, работы, прысвечаныя вайне 1812 года, паўстанням 1830–1831 і 1863–1864 гадоў. Экспануюцца кнігі ўспамінаў дзяржаўных дзеячаў і чыноўнікаў, якія вызначалі грамадска-палітычнае жыццё на беларускіх землях, арыгіналы эпісталярных і мемуарных крыніц – лісты, дзённікі, успаміны грамадскіх дзеячаў, удзельнікаў паўстанняў. Выстаўлены прыклады перыядычнага друку ХІХ – пачатку ХХ стагоддзяў, першыя выданні заканадаўчых актаў, а таксама літаратурныя творы ХІХ стагоддзя, якія паслужылі гістарычнымі крыніцамі для аўтараў манаграфіі. На выставе будуць прадстаўлены не толькі арыгіналы крыніц ды ўзоры ранняй гістарыяграфіі грамадска-палітычнага руку канца XVIII — пачатку ХХ стагоддзяў, але і асноўныя дасягненні сучаснай гістарыяграфіі ў гэтай сферы.
Запрашаем усіх жадаючых у інфармацыйна-выставачны цэнтр ЦНБ НАН Беларусі (вул. Сурганава, 15).
Кантактная інфармацыя:
(+375 17) 284 18 39 Андрэй Уладзіміравіч Унучак, загадчык аддзела гісторыі Беларусі Новага часу Інстытута гісторыі НАН Беларусі
(+375 17) 284 10 12 Аляксандр Віктаравіч Сцефановіч, загадчык аддзела рэдкіх кніг і рукапісаў ЦНБ НАН Беларусі